Сүгірбаева Гүлжан Дәулетбекқызы 1964 жылы 21  қарашада  Оңтүстік Қазақстан облысы Ленгір қаласында мемлекеттік қызметкер жанұясында дүниеге келді.

1982 жылы Ленгір қаласындағы В. Комаров атындағы орта мектепті алтын медальмен, 1982-1987 жылдары Шымкент мемлекеттік педагогика институтының тарих және педагогика факультетін үздік дипломмен бітірді.

1987-1994 жылдары Шымкент қаласындағы №41 орта мектепте пионер ұйымының жетекшесі, №29 орта мектепте тарих пәнінің мұғалімі, 1994-1995 жылдары Шымкент педагогика институтының Жалпы тарих кафедрасында оқытушы болды.

1995 жылы Қазақстан Республикасының Ұлттық Ғылым Академиясының Ш.Уалиханов атындағы тарих және этнология институтының аспирантурасына түсіп, 2000 жылы “Узбекское население Казахстана в 20-30-е годы ХХ века: проблемы истории и культуры” тақырыбында кандидаттық диссертация қорғады.

2000-2002 жылдары Қ.А.Ясауи атындағы Халықаралық қазақ-түрік университеті Шымкент институты «Бүкіл әлем тарихы» кафедрасының оқытушысы, аға оқытушысы, 2002-2010 жылдары аталған кафедраның  меңгерушісі болды.

2010-2011 оқу жылында Академиялық инновациялық университетінің Қазақстан тарихы кафедрасында доцент, 2012-2013 оқу жылында Л.Н.Гумилев атындағы Еуразия ұлттық университетінің Археология және этнология кафедрасында доцент қызметтерін атқарды.

2013 жылы Оңтүстік Қазақстан мемлекеттік педагогикалық университетінің Қазақстан және әлем тарихы кафедрасында доцент, 2014 -2016 жылдары аталған кафедраның меңгерушісі, 2016-2018 жылдары «Ғылыми-зерттеу бағдарламалардың сараптау» бөлімінің басшысы, 2018-2020 жылдары «Менеджмент және мониторинг» бөлімінің басшысы қызметтерін атқарды.

2004-2005 жылдары Ресей ғалымдарымен бірге орта мектеп оқушыларына арнап орыс және қазақ тілінде шығарылған “Қазіргі заман тарихы” және “ХХ ғасырдағы әлем” атты оқулықтардың авторы.

Г.Д.Сүгірбаева Түркия,  Қытай, Ресейде ғылыми тағылымдамадан өтіп,  біліктілігін арттырған. 4 оқулық, 2 оқу-әдістемелік құрал, 50-ге жуық мақаланың  авторы. Оның ішінде 6-ы шетелдік импакт-факторы журналдарда жарияланған. Г.Д.Сүгірбаеваның жетекшілігімен бірнеше халықаралық конференция, олимпиадалар өткізілді.

Жоғары оқу орнының “Үздік оқытушысы” (2010).

Қазақ хандығының 550 жылдығына арналған мерейтойлық медальмен (2015),. Оңтүстік Қазақстан облысының әкімінің Алғыс хатымен (2017),  Түркістан облысының маслихатының Алғыс хатымен (2018) марапатталды.

Исабек Баршагүл Қашқынқызы 1973 жылы 28 мамырда Оңтүстік Қазақстан облысы, Ордабасы ауданында (бұрынғы Шымкент облысы, Бөген ауданы) дүниеге келді. 1980 жылы «Мақташы» бастауыш мектебіне барып, 1990 жылы «Жамбыл» орта мектебін медальмен бітірді.

     1990 жылы М.Әуезов атындағы Шымкент педагогикалық институтының «Тарих» мамандығына оқуға түсіп, 1995 жылы Қ.А.Ясауи атындағы Халықаралық қазақ-түрік университеті Шымкент бөлімшесін «Тарихшы, тәрбие жұмысының методисі» біліктілігі бойынша үздік дипломмен бітірді.

      Еңбек жолын 1995 жылдан бастап, күні бүгінге дейін әртүрлі кезеңдерде әртүрлі атпен аталған Оңтүстік Қазақстан мемлекеттік педагогикалық университетінде үздіксіз жұмыс істеп келеді. 1995-1998 жж. Қ.А. Ясауи атындағы халықаралық қазақ-түрік университеті Шымкент бөлімшесінің Қазақстан тарихы кафедрасында ізденуші-машықтанушы, 1998-2000 жж. Бүкіләлем тарихы кафедрасында аға оқытушы, 2000-2002 жж. Тарих факультетінің декан орынбасары, 2002-2003 жж. «Қазақстан тарихы» кафедрасының меңгерушісі, 2003-2004 жж. Сырттай оқу факультетінің деканының орынбасары, 2004-2011 жж. Тарих және заң факультетінің деканы, 2011-2012 жж. Оңтүстік Қазақстан мемлекеттік педагогикалық институты Тарих және педагогика факультетінің деканы, 02.08.2012- 05.09.2014 жж. Оңтүстік Қазақстан мемлекеттік педагогикалық институтының Тәрбие істері жөніндегі проректоры, 05.09.2014-06.01.2015 жж. Әлеуметтік және тәрбие істері жөніндегі проректор, 06.01.2015-28.12.2017 жж. Бірінші проректор, оқу ісі жөніндегі проректор, 29.12.2017-14.02.2018 жж. Оңтүстік Қазақстан мемлекеттік педагогикалық университетінің Бірінші проректор, оқу ісі жөніндегі проректоры, 14.02.2018-03.06.2019 жж. Оңтүстік Қазақстан мемлекеттік педагогикалық университетінің Оқу және оқу-әдістемелік істері жөніндегі проректоры, 03.06.2019-18.10.2019 жж. Оңтүстік Қазақстан мемлекеттік педагогикалық университетінің ректоры міндетін атқарушы, 18.10.2019-03.10.2021 жж. Оңтүстік Қазақстан мемлекеттік педагогикалық университетінің Оқу және оқу-әдістемелік істері жөніндегі проректоры болып қызмет етті. 04.10.2021 жылы Басқарма төрағасының орынбасары-Академиялық мәселелер жөніндегі проректор атауына өзгертілді. 04.04.2022-29.09.2022 жж. Басқарма мүшесі-Тәрбие және әлеуметтік істер жөніндегі проректор, 30.09.2022 ж.бастап   Басқарма мүшесі – Стратегиялық даму және әлеуметтік істер жөніндегі проректор қызметін атқаруда.

     1999 жылы 27 сәуірде ҚР Ұлттық Ғылым Академиясы Ш.Ш.Уәлиханов атындағы Тарих және этнология институтында «Академик Р.Б.Сүлейменов: Қазақстан тарихын зерттеудегі үлесі және ғылыми-ұйымдастырушылық қызметі» деген тақырыпта 07.00.02–Отан тарихы (Қазақстан Республикасының тарихы) мамандығы бойынша кандидаттық диссертация қорғады. 2008 жылы доцент ғылыми атағына ие болды.

2006 жылы Қазақстан Республикасы Білім және ғылым министрлігінің «2006-2008 жж. Дарынды жас ғалымдарға арналған мемлекеттік стипендиясының» иегері болды. ҚР БжҒМ «Жоғары оқу орнының үздік оқытушысы-2008», «Жоғары оқу орнының үздік оқытушысы-2021»  грантын екі рет жеңіп алды.

      ҚР Президентінің (Н.Ә.Назарбаевтың, Қ.К.Тоқаевтың) Алғыс хаттарымен, «Нұр Отан» партиясының Төрағасы Н.Ә. Назарбаевтың Алғыс хатымен, Оңтүстік Қазақстан облысы әкімінің грамотасымен, Шымкент қаласы әкімінің алғыс хаттарымен, Оңтүстік Қазақстан облыстық мәслихатының Құрмет Грамотасымен, «Нұр Отан» партиясы Оңтүстік Қазақстан облыстық филиалы төрағасының бірінші орынбасарының Алғыс хатымен, Оңтүстік Қазақстан облыстық әкімдігінің «Облысқа сіңірген еңбегі үшін» (2017 ж.) медалімен, ҚР БжҒМ «Білім беру ісінің құрметті қызметкері» (2018 ж.) төсбелгісімен марапатталған.

      Оңтүстік Қазақстан облысы әкімдігі мен Шымкент қаласының әкімдігі жанындағы Елбасының Жолдауын насихаттау жөніндегі лекторлар тобының белсенді мүшесі болып, ОҚО Ішкі саясат басқармасы ұйымдастырған байқауда 2005 жылы «Ең үздік лектор», 2014 жылдың қорытындысы бойынша «Ең үздік насихатшы» номинациясын жеңіп, дипломмен марапатталды. "Нұр Отан" партиясы  "Білім және ғылым" дамыту жөніндегі қоғамдық кеңесінің төрайымы. Шымкент қаласы Қоғамдық Кеңестің мүшесі.

      Б.Қ.Исабек – 150-ге жуық ғылыми мақала, 1 монография, 8 оқу құралы, 7 авторлық оқу бағдарлама, 12 оқу-әдістемелік құралының авторы. Бірнеше халықаралық, республикалық ғылыми конференцияларда баяндамалар жасап, Стамбул, Измир, Мәскеу, Цукуба (Жапония), Ташкент, Астана, Алматы қалаларында білімін жетілдіріп, біліктілікті арттыру курстарынан өткен. ҚР Президенті Қ.К.Тоқаевтың "500 Ғалым жобасы" бойынша 2022 жылы "Болашақ" халықаралық  стипендия иегері атанып Германия Федеративтік Республикасында тағлымдамадан өтті және "Стратегиялық менеджмент және жоғары білім берудегі көшбасшылық. Университетті басқару" сертификатын иеленді.

      Б.Қ.Исабектің жетекшілігімен бірнеше магистрлік диссертациялар мен дипломдық жұмыстар қорғалды. Шәкірттері Қазақстан Республикасы Білім және ғылым министрлігі ұйымдастырған республикалық олимпиадалардың, ғылыми жұмыстардың, «Болашақ» стипендиясының жүлдегерлері болды. Оның тікелей жетекшілігімен бірнеше республикалық, халықаралық деңгейдегі ғылыми-теориялық, ғылыми-тәжірибелік конференциялар және республикалық олимпиадалар өткізілді.

      Б.Қ.Исабектің тікелей басшылығымен Оңтүстік Қазақстан мемлекеттік педагогикалық институты 2015 жылдың 2-9 сәуір аралығында институционалдық және 23 мамандық бойынша мамандандырылған аккредиттеуден өтті.  Білім беру сапасын қамтамасыздандыру тәуелсіз қазақстандық агенттігі жүргізген сыртқы аудиттен сәтті өтуіне байланысты оқу орны 5 жыл мерзімге, яғни 24.04.2020ж. дейін ұзартылған куәлікке ие болды. 2020 жылы тағы да 5 жылға қайта аккредиттелді.

2017 жылы Қазақстан Республикасы Білім және ғылым министрлігі тарапынан педагогикалық институттарды университет жасау үшін жұмыс жасауға тапсырма берілді. Ол үшін институттарға бакалавр-магистратура-докторантура деңгейінде кемінде үш бағытта мамандықтарға лицензия алу керек болды. Осы күрделі міндетті Баршагүл Қашқынқызы абыроймен атқарып шықты. 2016-2017 оқу жылында институттың 23 мамандығына қоса Білім және ғылым министрлігінің эксперименттік бағдарламасы бойынша 6 қосарланған Химия-Биология, Математика-Физика, Математика –Информатика, Физика-Информатика, География-Тарих, Тарих-Дінтану мамандықтарына  лицензия алынды. Сонымен қатар   институтымыздың  университет мәртебесіне ие болу үшін үш бағыт бойынша  төрт мамандыққа  қоса лицензия алынды: Дизайн, Филология,  Аударма ісі,  Биология.

Қазақстан Республикасының Білім және ғылым  министрлігінің  Білім және ғылым саласындағы бақылау комитетінен білім берудің үш саласы : Педагогикалық ғылымдар, Өнер және гуманитарлық ғылымдар, Жаратылыстану ғылымдары, математика және статистика даярлау бағыты бойынша магистратура, докторантура және әскери кафедра ашу барысындағы жұмыстың күрделілігі, жауапкершілігі және  абыроймен атқаруда Б.Қ.Исабектің еңбегі ерен. 2018-2019 оқу жылында университет жоғары оқу орнынан кейінгі мамандықтар бойынша 15 мамандыққа магистратураға және  8 мамандыққа докторантураға мемлекеттік лицензияларға ие болды. 2019-2020 оқу жылына 34- бакалавриатқа, 22- магистратураға, 11- докторантураға  арналған  жаңа білім беру бағдарламалары жасалынып, университеттің Ғылыми кеңесінде бекітілді.

Керимбеков Ержан Рахымжанұлы 1986 жылы 7 мамырда Түркістан облысы, Төле би ауданы, Бірінші мамыр ауылында дүниеге келген. 2003 жылы Бірінші мамыр жалпы орта білім беретін мектебін үздік бітіріп, 2004-2008 жылдары Қ.А.Ясауи атындағы университетінің математика факультетін, 2008-2010 жылдары осы университеттің математика факультетінің магистратурасын бітіріп, 2015-2017 жылдары Саясаттану және мемлекеттік басқару (қашықтықтан) факультетінің магистратурасын, 2011-2017 жылдары Гази Университеті(Туркия), Компьютерлік инженерия мамандығын тәмамдаған.

Алғашқы еңбек өтілі 2008-2009 жылдары Қ.А.Ясауи университетінде математика кафедрасында оқытушы болып жұмыс атқарады. 2009-2010 жылдары Қ.А.Ясауи университетінің Ғылым бөлімінде маман болып қызмет атқарады. 2011-2017 жылдары Гази Университетінің Ғылым бөлімінде ізденуші қызметін атқарады. 2015-2017 жылдары Гази Университетінде TUBITAK 3001 жобасында аға ғылыми қызметкер, 2017-2018 жылдары Ахмет Ясауи Университетінде Компьютерлік ғылымдар кафедрасында Аға оқытушы, Коммерцияландыру офисінде басшы болып, Ғылымды коммерцияландыру департаментінің директоры қызметін атқарады.

Е.Р.Керімбеков орыс, түрік, ағылшын тілдерін меңгерген.  Сондай-ақ Қ.Р Талантты жас ғалым мемлекеттік стипендия (2019), Қазақстан Ұлттық Жаратылыстану Ғылымдары Академиясының корреспондент мүшесі (2019), Халықаралық ақпараттандыру академиясының академигі (2019), Түркістан облысы мәслихатының грамотасы (2019), Түркістан облысының үздік жас ғалымы (2020) марапаттарына ие. Аударма тәжірибелері: Елбасы Н.Ә. Назарбаевтың «Ұлы дала ұлағаттары» 2017 (қазақшадан-түрікшеге), ТҮРКПА мүше елдері арасында құқықтық ынтымақтастық туралы Регламент. 2017 (орысшадан-түрікшеге).

Е.Р.Керімбеков қоғамдық жұмыстарға да белсенді қатысып отырған. ҚР Білім және Ғылым министрлігі, Ұлттық ғылыми-техникалық сараптама орталығының сарапшысы, Түркі тілдес елдердің парламенттер ассамблеясы ұйымының тәуелсіз сарапшысы, Түркістан  облысы Инновациялық жобалар мен кәсіпкерлікті қолдау комиссиясының мүшесі болған.