Өзбекәлі Жәнібеков атындағы Оңтүстік Қазақстан педагогикалық университетінде белгілі қаламгер, ҚР Парламенті Мәжілісі бірінші шақырылымының депутаты, тұңғыш қазақ тілінде жазылған «Халықтың көші-қоны туралы» заңының авторы Әкім Ысқақпен кездесу өтті.
Әдеби-рухани сырласу кешіне айналған кездесуде мәртебелі қонақ өзінің өмір жолындағы қызықты әрі әсерлі естеліктермен бөлісті. Шетелдегі қазақ балалары, ұлттық намысқа өрнектелген ой иірімдері тыңдарманды тебірентті.
Әдеби кеште айтыскер ақын Кәрима Оралова домбырамен арнау айтты. Кездесуді университет Басқарма төрағасы-ректор міндетін атқарушы Гүлжан Сүгірбаева жүргізді.
Әкім Ысқақ бұрынғы Шымкент педагогикалық университеті болған оқу орнымыздың мақтанышы. Сондықтан да болар, белгілі тұлғаның әсіресе студенттік жылдардан шерткен сыры көпшілікке әсерлі болды.
Кездесу соңында Әкім Ысқақ “Алтыным” жаңа кітабын Әбсаттар Дербісәлі атындағы университеттің ғылыми кітапханасына, оқытушылар мен жастарға сыйға тартты.