Өзбекәлі Жәнібеков атындағы ОҚПУ-да өткен кітап фестивалінде университеттің Әбсаттарқажы Дербісәлі атындағы ғылыми кітапханасының кітап қоры тағы бір тарихи құнды жинақпен толықты.

Ол — Қазақстан Республикасы Президенті Архивінің Ғылыми Кеңесі ұсынған «Алашорда ісі. 1920-1940 жж. Құжаттар мен материалдар» атты 12 томдық жоба. Құнды еңбекті Басқарма мүшесі — Стратегиялық даму және әлеуметтік мәселелер жөніндегі проректор Баршагүл Исабек кітапхана директорына табыс етті.

Аталған жинаққа кеңестік жылдардағы Алаш қозғалысы мен саяси қуғын-сүргін тарихын және ақтаңдақтарын саралау үшін түзілген көптомдық құжаттары, саяси қуғын-сүргінге ұшыраған алаштықтарды ақтауға қатысты құжаттар мен материалдар топтастырылған. Сондай-ақ, ақтау үдерісіне қатысты кезіндегі Орталықтан қабылданған ресми директивтік нұсқаулықтармен қатар саяси қуғын-сүргін құрбандарының ұрпақтары мен туған-туыстарының әкесін, жұбайын, бауырын ақтауды өтінген арыз-өтініштері, оларға берілген ресми жауаптары енгізілген. Құжаттардың басым көпшілігі алғаш рет жарияланған.

Жинақтың ғылыми жетекшісі — Мәмбет Қойгелдиев. Редакция алқасын Е.Қарин (бас редактор), Х.Әбжанов, Қ.Әлімғазинов, З. Қабылдинов, С. Қасымов, Д. Қамзабекұлы, Ә.Мұстафина, (жауапты редактор) , Г.Нұрымбетова, Е.Сыдықов құрайтын жобаны «Самұрық-Қазына» қоры қаржыландырған. Құнды еңбек оқу орнымыздың тарихшыларына, барлық ЖОО оқытушыларына, докторанттар мен магистранттар, студенттерге, сондай-ақ, ХХ ғасырдағы Қазақстан тарихына қызығушылық танытушыларға бағалы қазына болмақ.