МУЗЫКА ПӘНІН ОҚЫТУДЫҢ МЕКТЕПТЕРДЕГІ ҒЫЛЫМИ ҚОЛДАНЫСЫ ҚАНДАЙ?

4 Сәуір 2025, 17:09

Медиа Орталық

«Өнер және білім» факультеті, музыкалық білім кафедрасының ұйымдастыруымен «Қазақстанның шығармашылық индустриясын енгізу жағдайында музыкалық білім берудің даму болашағы» тақырыбында «дөңгелек үстел» өткізілді. «Дөңгелек үстелді» аға оқытушы, педагогика ғылымдарының доқторы Роза Сыдықова жүргізіп, педагогикалық тәжірибесімен бөлісті.

Шараның мақсаты болашақ музыка мұғалімдерінің ғылыми-ағартушылық қызметін сақтап, дамытуға арналды. Олардың міндеті – білімді меңгеріп қана қоймай, оны жетілдіру және орындаушылық шеберлікті дамыту.

«Дөңгелек үстел» барысында музыкалық білім берудің даму перспективалары Бибігүл Төлегенова атындағы креативті мектептің мысалында айқын көрсетілді. Мектепте оқушылар жоғары деңгейде білім алады, бұған мектептің заманауи инфрақұрылымы да ықпал етеді. Музыкалық білім беру дамуының тарихына үңілсек, оның негізі өткен ғасырдың 20-30-жылдары қаланғанынан бастап бүгінгі күнге дейін әдістемелік және методологиялық тұрғыдан үлкен серпіліс жасаған.

Кафедра меңгерушісі Алена Досбағанбетова ғылымның кафедра үшін ерекше маңызын айта өтіп, Қазақстандағы алғашқы креативті мектептің аты аңызға айналған тұлға Бибігүл Ахметқызының есімімен аталғанына көңіл аударды. Сондай-ақ музыка пәнін оқытудағы ғылыми тәжірибелердің осы мектепте жүзеге асып жатқанын бағыттады.