ШЕТЕЛДІК ЖАСТАРДЫ УНИВЕРСИТЕТІМІЗГЕ ОҚУҒА ШАҚЫРДЫ

12 Мамыр 2025, 19:08

Медиа Орталық

Өзбекстан Республикасы, Науаи облысы, Зарафшан қаласында Қазақстандағы жоғары оқу орындарының қатысуымен білім көрмесі өтті. «Отандастар» қорының ұйымдастыруымен өткен ауқымды шара Қазақстан мен Өзбекстан арасындағы достық пен білім саласындағы әріптестікті нығайту мақсатында қазақ диаспорасы өкілдеріне арналды.

Көрмеге Қазақстанның беделді 10 университеті қатысты. Ал, шетелдік жастарға Өзбекәлі Жәнібеков атындағы ОҚПУ-ды маркетинг бөлімінің басшысы Арман Қылышбаев таныстырды. Ол болашақ педагог болғысы келетін талапкерлерге университет жайлы жан-жақты ақпарат беріп, кәсіптік бағдар жұмыстарын жүргізді. Шетелдік қандастарға оқуға түсу барысында қандай жеңілдіктер жасалатынын түсіндірді.

Бүгінде университетімізде шетелдік қазақ жастарына оқу үшін жатақхана, тағы басқа көптеген жағдайлар қарастырылған. Талапкерлер тест тапсырмай-ақ, сұхбаттасу кезеңі арқылы да оқуға қабылдана алады.