🔹 Өзбекәлі Жәнібеков атындағы ОҚПУ 3 курс студенттері 2-қыркүйектен  бастап  академиялық кезеңмен қатар аптасына 2 күндік педагогикалық практикаға жіберілді. 

🔹 Орнықтыру конференциясы – болашақ педагогтардың кәсіби жолындағы алғашқы қадамын айқындап, педагогикалық практиканың маңызды бастамасы болып табылады. Конференция барысында білім алушыларға педагогикалық практика мақсаты мен міндеттері таныстырылып, мектептердегі іс-тәжірибе кезеңінің талаптары түсіндірілді. Сонымен қатар, болашақ педагогтардың кәсіби құзыреттілігін арттыруға бағытталған әдістемелік нұсқаулар берілді.

🔹 Басқарма мүшесі-Академиялық мәселелер жөніндегі проректор Жанбол Жылбаев педагогикалық практиканың теориялық білімді тәжірибемен ұштастыруға, болашақ ұстаздың кәсіби дағдыларын жетілдіруге бағытталған шешуші қадам екендігін атап өтті. 

🔹 —  Біздің университетіміздің басты мақсаты – заманауи білім беру талаптарына сай, шығармашыл, жауапты және бәсекеге қабілетті ұстаздарды даярлау. Осы тұрғыда практика барысында білім алушыларымыз мектеп өміріне етене араласып, оқыту мен тәрбиелеу үдерісінің қыр-сырын меңгереді, педагогикалық ұжыммен жұмыс жасау тәжірибесін жинақтайды, —деді ол. 

🔹 Педагогикалық практика студенттердің әлеуметтік және кәсіби бейімделуіне жағдай жасауға және педагогикалық тәжірибені игертуге мүмкіндік жасайды. Орнықтыру конференциясына Басқарма мүшесі-Академиялық мәселелер жөніндегі проректормен қатар, академиялық департамент директоры, факультет декандары, кафедра меңгерушілері, практика жетекшілері, педагог және психолог әдіскерлер қатысты. 

🔹 Қазіргі таңда университет бойынша 1900-дан астам білім алушы Шымкент қаласындағы 80-ге жуық білім беру ұйымдарына педагогикалық практикадан өтуге жіберілді.