ТӨТЕНШЕ ЖАҒДАЙҒА ДАЙЫНДЫҚ ПЫСЫҚТАЛДЫ

23 Қыркүйек 2025, 17:51

Медиа Орталық

Өзбекәлі Жәнібеков атындағы ОҚПУ-да Шымкент қаласы аумағында орналасқан нысандардағы төтенше жағдай кезінде Азаматтық қорғаныс жоспарына сай оқу-жаттығу шарасы өтті.

Университеттің инфрақұрылымды дамыту департаментінің директоры, азаматтық қорғаныс штаб бастығы С.Махановтың нұсқауымен қызметкерлерді қорғау үшін барлық қауіпсіздік шаралары қарастырылды.

Жауаптылар өздерiне жүктелген қызметтiк мiндеттер бойынша жауап беріп, жер сiлкiнiсi қауiпi орын алған жағдайда әрбірі атқаратын жұмыстарды көрсетті. Ғимараттың 1-2 қабатынан адамдар толық шығарылып, алдын ала белгiленген қауiпсiз орындарға жеткізілді. Ал, 3-4 және одан жоғары қабаттағы адамдар ғимараттың қауiпсiз жерлерiнде қалды. Жеке құрамның ер азаматтары зардап шеккендерге көмек көрсетіп, қауiпсiз алаңға алып шықты. Адамның үстіндегі жанып жатқан киім қолда бар заттармен (кілемше, күртеше, кішігірім көрпені абайлап адамның үстіне лақтырып, жанып тұрған бөліктерді ауа жетпейтіндей етіп жауып тастап), өрт сөндіру құралдарымен өшірілді.

Ал, бұл кезеңде жарақат алғандар мен зардап шеккендерге медициналық көмек көрсетіліп, байланыс құралдары қалпына келтірілді. Нысанда тәулік бойы кезекшілік жұмысы ұйымдастырылып, өзіне және өзара көмек көрсету әдістері пысықталды. Өрт ошақтары уақтылы сөндіріліп, ғимаратта жарақат алған адамдар қалдырылмай, оқу-жаттығу жұмыстары сәтті аяқталды.

Оқу-жаттығу жиынына қатысқан Шымкент қаласы Әл-Фараби ауданының Төтенше жағдайлар басқармасының өкілдері азаматтық қорғаныс жұмыстарына оң бағасын берді.

— Шымкент қаласы 7-8 баллдық сейсмикалық қауіпті аймақ болғандықтан ұйымдар мен мекемелерде дайындық жұмыстары тоқсан сайын жүргізіледі. Адамдар көп шоғырланатын мекеннің бірі университет болғандықтан, мұнда құрылымдық топтар құрылып, олардың іс-әрекеті, құтқару, барлау, медициналық көмек топтарының жұмысы пысықталып, біздің тараптан әдістемелік көмек көрсетеміз. Адамдар көбіне мұндай жағдайда ашық алаңқайлар мен алаңға шығуды, лифтіні қолданбау керегін білмейді. Жер сілкінісі кезінде адамдар ғимарат ішінде қалып қойса қабырғалардың бұрышын қалқан қылып немесе үстелдің астына тығылып, дүмпу аяқталған соң аспай, саспай сыртқа шығуы тиіс, — дейді басқарма офицері, капитан Арнат Ұланов.

Азаматтық қорғаныс жиынында қорытынды сөз сөйлеген университет Басқарма мүшесі-Стратегиялық даму және әлеуметтік істер жөніндегі проректор Баршагүл Исабек қонақтар мен қатысушыларға, штаб жұмысына алғыс білдірді.