ZHANIBEKOV UNIVERSITY-де профессор, университет жанынан құрылған археологиялық орталықтың жетекшісі А.Н.Подушкиннің «Қаңлы мемлекеті б.з.д. ІІ ғ— б.з ІY ғ. археологиялық деректер негізінде» монография-кітабының таныстырылымы өтті.

Кітаптың тұсаукесеріне Шымкент қаласы әкімінің орынбасары Сәрсен Құранбек, археолог, тарих ғылымдарының докторы, профессор, Герман археология институтының корреспондент мүшесі Зейнолла Самашев, алыс және жақын шетелден, атап айтқандай, Ұлыбритания, Франция, Венгрия, Нидерланды, Ресей, Өзбекстан, Қырғызстан тарихшылары мен археология саласының жергілікті мамандары қатысты.

Таныстырылымды университет Басқарма төрағасы-ректор міндетін атқарушы Әлібек Нұртаев құттықтау сөзбен ашты.

— Бұл еңбек – еліміздің көне тарихы мен мәдени мұрасын зерттеу ісіне қосылған сүбелі үлес, археологиялық ғылым саласындағы іргелі ізденістеріңіздің жемісі. Кітапта Қаңлы мемлекетінің даму кезеңдері, әлеуметтік құрылымы мен материалдық мәдениеті терең талданып, археологиялық деректер арқылы тарихи шындықтың жаңа қырлары ашылған. Сіздің еңбегіңіз жас ғалымдарға үлгі болып, отандық археология ғылымының дамуына зор серпін беретініне сенімдіміз, — деді Әлібек Нұрбайұлы. Профессорға бұдан кейін Шымкент қаласы әкімдігінің құттықтауы мен сый-сияпаты табыс етілді.

Шетелдік тарихшылар мен археологтар үшін Қаңлы мемлекеті — Ұлы Жібек жолының қалыптасуындағы маңызды мәдени-саяси факторлардың бірі. Подушкиннің археологиялық деректерге сүйенген нақты зерттеулері Еуразия кеңістігіндегі ежелгі өркениеттер арасындағы байланыстарды анықтауға зор үлес қосады. «Бұл еңбек “Орталық Азия археологиясын жаңа деңгейге көтерген жүйелі зерттеу. Қаңлы өркениетінің археологиялық бейнесін жаңаша танытып, Қазақстан археологиясын халықаралық деңгейге көтерген ғылыми еңбек» дейді аталмыш монографияның маңыздылығы туралы ғылыми-зерттеу жиынына онлайн қатысып, пікір білдірген шетелдік тарихшылар. Ал, отандық археологтар бұл еңбектің ұлттық ғылымдағы орнына, деректік жаңалығы мен ғылыми мектептің дамуына назар аударды.

Профессор А.Н.Подушкиннің ғылымдағы 15 жылдық табандылығының арқасында осы Қаңлы жазуларының құпиясы ашылып, Қазақстан археологиясында өз орнын тапты. «Жоғары деңгейде дамыған өркениеттің көрінісі мен мемлекеттіліктің айрықша белгісі ретінде Қаңлы жазбасы Қазақстан Республикасының қазіргі ғылыми және азаматтық қоғамы үшін үлкен әлеуметтік маңызға ие. Бұл жәдігер ежелгі қазақтардың мәдени мұрасы және олардың салт-дәстүрі қаншалықты бай әрі терең екенін дәлелдейді» дейді А.Н. Подушкин.