Түркиядағы Antalya Bilim Koleji оқытушылары мен қызметкерлері бастаған делегация Zhanibekov University –де қонақта болды. Делегация құрамында мектеп-лицейдің оқушыларымен қатар, қаламыздағы Green School және Nomad School өкілдері мен оқушылары да болды.
Түркиядан келген делегацияның мақсаты – қаладағы жетекші жоғары оқу орындарының біріне айналған Zhanibekov University оқу-әдістемелік базасымен, заманауи инфрақұрылымымен танысу, өзара тәжірибе алмасу және халықаралық білім беру кеңістігінде тығыз ынтымақтастық орнату. Сонымен қатар, тараптар мәдениетаралық байланыстарды нығайтып, білім беру саласындағы озық тәжірибелер мен инновациялық әдістермен бөлісуге ниет білдірді.
Қонақтарды университет Басқарма мүшелері жылы қабылдап, оқу орнының тыныс-тіршілігімен жан-жақты таныстырды. Атап айтқанда, археологиялық орталықтың қазба байлықтарынан құралған көрмеден бастап, Өзбекәлі Жәнібеков орталығын, ғылыми кітапхана мен үйірмелерді аралады.
Шара соңында делегация мүшелеріне университет тарапынан арнайы дайындалған кәдесыйлар тарту етіліп, қонақжайлық пен ілтипат көрсетілді. Түркиялық қонақтар Жәнібеков университетіне ризашылықтарын білдіріп, болашақта тағы да осындай жылы кездесулердің жалғасуына үміт білдірді.