Бүгін университеттің коворкинг орталығында «Мемлекеттік рәміздер – Тәуелсіздік символы» тақырыбында “дөңгелек үстел” өткізілді. Іс-шараның мақсаты – Қазақстан Республикасының мемлекеттік рәміздерінің маңызын насихаттау, жастардың патриоттық санасын қалыптастыру және мемлекеттік нышандарға деген құрметті арттыру. “Дөңгелек үстелге” профессор-оқытушылар құрамы, докторанттар, магистранттар мен студенттер қатысты. Іс-шараны Тәрбие және жастар саясаты департаментінің директоры Қайрат Анарбаев жүргізді.

Іс-шара барысында баяндамашылар мемлекеттік рәміздердің қалыптасу тарихы, олардың тәуелсіз Қазақстанның дамуындағы орны, ұлттық бірегейлік пен патриотизмді нығайтудағы рөлі туралы мазмұнды баяндамалар жасады. Қатысушылар Қазақстан Республикасының Туы, Елтаңбасы және Әнұранының тарихи және рухани мәні жөнінде пікір алмасты. Пікірталас барысында жастар арасында мемлекеттік рәміздерді құрметтеу мәдениетін қалыптастыру, ұлттық құндылықтарды дәріптеу және азаматтық жауапкершілікті арттыру мәселелері талқыланды.

Жиын соңында қатысушылар мемлекеттік рәміздер – ел тәуелсіздігінің, ұлттық бірліктің және егемендіктің басты белгілері екендігін атап өтіп, оларды құрметтеу әрбір Қазақстан азаматының қасиетті борышы деген қорытындыға келді.