Өзбекәлі Жәнібеков атындағы Оңтүстік Қазақстан педагогикалық университетінде 16 желтоқсан – Қазақстан Республикасының Тәуелсіздік күні аясында үш бірдей жаңа кабинет ашылды.
Университеттің тарих және педагогика факультетінде Өзбекәлі Жәнібеков дәрісханасы, «Этнопедагогика», «Тәрбие жұмыстарының әдістемесі мен теориясы» кабинеттері енді студенттердің игілігіне пайдаланылмақ. Бұл кабинеттер туған ел тарихы мен тілін, мәдениетін, салт дәстүрі мен әдет-ғұрпын білуге, тануға, сақтауға жастардың қызығушылығын арттыруды көздейді.
Халықтық педагогиканың қайта өркендеуі мен оны оқып-үйренудің танымдық және практикалық мәнін көрсету де осы жаңа орталықтарда жүзеге аспақ. Сондай-ақ, педагогикалық мәселелерді шығармашылық тұрғыда және жаңа инновациялық технологияларды қолдана отырып шешудің тиімді жақтарын қарастырады. Білім алушылар арасында креативті идеяларды тудыру мен жүзеге асырудың жолдарын зерттеу барысында түрлі «дөңгелек үстелдер», семинарлар мен топтық жұмыстар ұйымдастырылады.
Жаңа кабинеттердің ашылуына университет қонақтары мен Басқарма төрағасы-ректор міндетін атқарушы Гүлжан Сүгірбаева, оқытушы-профессорлар мен студенттер қатысты.