ГАЗИ УНИВЕРСИТЕТІНІҢ РЕКТОРЫ УГУР ҮНАЛ ZHANIBEKOV UNIVERSITY ТАРИХШЫЛАРЫНА ДӘРІС ОҚЫДЫ

26 Қыркүйек 2025, 17:25

Медиа Орталық

Түркияның Гази университетінен филиалдың жұмысын тиімді ұйымдастыру мақсатында келген Ректор Угур Үнал бүгін ресми келісім құжаттарына қол қою рәсімінен кейін университет тарихшыларына ашық дәріс өткізді. Лекцияға Тарих және педагогика факультетінің оқытушы-профессорлары мен білімгерлері қатысты.

— Тарихты зерттеу – тек өткенді білу емес, сол өткен арқылы қазіргі мен болашақты түсінудің кілті. Тарихшы ең алдымен шындықты іздеуі керек. Ол өз көзқарасына немесе саяси бағытқа емес, деректерге, дереккөздерге, фактілерге сүйенуі қажет. Тарихты бұрмалауға немесе қандай да бір идеологияға қызмет етуге болмайды. Мысалы, бір оқиғаны бірнеше елдің, мәдениеттің немесе идеологияның тұрғысынан қарастыру – нағыз тарихшының кәсібилігі. Архивтермен жұмыс істеу, көне құжаттарды оқу, тарихи карталарды, жазбаларды талдау – тарихшының негізгі жұмысы. Көп оқу, көп іздену, тіпті жаңа тарихи дереккөздерді табу – кәсіби міндет. Әр тарихшы өз халқының тарихын білуге және оны әділетті түрде жеткізуге жауапты. Бірақ бұл ұлтшылдыққа ұласпауы тиіс. Шын тарихшы өз ұлтын мадақтау үшін емес, түсіну үшін зерттейді. Ол өз эмоциясын емес, деректі сөйлетуі керек, — деді Угур Үнал.

Ашық кездесуді Басқарма мүшесі-Ғылыми жұмыстар және инновациялар жөніндегі проректор Ержан Керімбеков жүргізіп отырды. Студенттер өздерін толғандырған сауалдарға жауап алды.