Бүгін университетте 25 қазан — Республика күніне орай «Еңсесі биік егемен елім» атты мерекелік концерт өтті. Мерекелік іс-шара Қазақстан Республикасының Мемлекеттік Туын салтанатты түрде алып кіру рәсімімен және Мемлекеттік Әнұранды орындаумен басталды. Концерт барысында патриоттық поэзиялық қойылымдар мен отаншылдық рухтағы музыкалық шығармалар орындалып, көрермендерге мерекелік көңіл күй сыйлады.

Іс-шара аясында университеттің Басқарма төрағасы – Ректор, заң ғылымдарының докторы, профессор Қайрат Рахымұлы Балабиев құттықтау сөз сөйлеп, ел тәуелсіздігінің маңыздылығына, ұлттық құндылықтарды дәріптеуге және білім мен ғылым саласының дамуына үлес қосып жүрген азаматтардың еңбегіне тоқталды.

Мерекелік концерт барысында университет қызметкерлерін марапаттау рәсімі де ұйымдастырылды. Еселі еңбек еткен қызметкерлерге Қазақстан Республикасы Ғылым және жоғары білім министрлігінің, Түркістан облысы және Шымкент қаласы әкімдіктерінің марапаттары мен алғыс хаттары, сондай-ақ салалық медальдар табысталды.

Концерттік бағдарламада «Жұмақ мекен», «Тау ішінде», «Алға, қазағым!», «Қанекей, тілім, сөйлеші», «Ақ бұлақ», «Шым қала» және «Өз елім» әндері шырқалды. Өнерпаздар көрермендерге ерекше әсер сыйлап, мерекенің мазмұнын байыта түсті.